Հայկական «ապագայի գրասենյակ». Woods Center-ն առաջարկում է աշխատանքային տարածքի նոր ձևաչափ՝ բնության գրկում

Woods Center–ն այն բանի օրինակն է, թե ինչպես է ենթակառուցվածքի, հարմարավետության և բնության համադրությունը Հայաստանում ձևավորում նոր մոտեցում աշխատանքային միջավայրի նկատմամբ

ԵՐԵՎԱՆ, 24 նոյեմբերի․ /Նովոստի–Արմենիա/․ Woods Center–ն այն բանի օրինակն է, թե ինչպես է ենթակառուցվածքի, հարմարավետության և բնության համադրությունը Հայաստանում ձևավորում նոր մոտեցում աշխատանքային միջավայրի նկատմամբ։ Woods Center-ի համահիմնադիր ու տնօրեն Արթուր Սաֆարյանը «Նովոստի–Արմենիա» գործակալությանը տված հարցազրույցում խոսել է այն մասին, թե ինչու են մթնոլորտը, էկոհամակարգը և networking-ը դառնում բիզնեսի հաջողության առանցքային գործոններ և ինչպես է կենտրոնը պլանավորում մասշտաբավորվել ամբողջ Հայաստանի տարածքում։

«Նովոստի–Արմենիա»․ հիշու՞մ եք այն պահը, երբ Woods Center-ի գաղափարն առաջին անգամ ձեզ կենդանի թվաց՝ ավելին, քան պարզապես թղթի վրա գրված նախագիծ։ 

Ա. Սաֆարյան․ Woods Center-ի գաղափարը եղբայրներիս հետ ծագել է 2018 թվականին՝ միջազգային ֆորումներ այցելելուց հետո, երբ ցանկացանք այդ փորձը ներդնել Հայաստանում։ Շինարարությունը սկսել ենք 2020 թվականին՝ կորոնավիրուսի համավարակից և 44-օրյա պատերազմից առաջ, իսկ ավարտել ենք 2024 թվականի ամռանը։

«Նովոստի–Արմենիա»․ հիշվում են հայտնի երգի տողերը՝ «Երևանը տուն ու շենք չէ, Երևանը մենք ենք»։ Նույնը կարելի է ասել Woods Center-ի մասին, որ այն պարզապես ճարտարապետություն չէ, այլ՝ մարդիկ, էկոհամակարգ և networking։ Խնդրում եմ պատմեք հայեցակարգի մասին, որով ստեղծվել է կենտրոնը։ 

Ա. Սաֆարյան․ առաջին հերթին ցանկանում էինք ստեղծել բնության հետ ներդաշնակ միջավայր։ Woods Center-ը կառուցվել է «Ջրվեժ» ազգային պարկի դիմաց՝ վաստակավոր ճարտարապետ Գարեգին Եղոյանի նախագծով։ Այն մոտ է Երևանի կենտրոնին, այստեղ կարելի է հասնել 15-20 րոպեում։ Մարդիկ կամ ընկերությունները, որոնք այստեղ անցկացնում են իրենց միջոցառումները, ապահովված են աշխատանքի համար անհրաժեշտ հիմնական հարմարավետ պայմաններով։ Ծառայության մեջ ներառված է նաև սուրճը, միրգը և բանջարեղենը։ Դրանց համար վճարել պետք չէ, քանի որ դրանց արժեքը ներառված է վարձակալության գնի մեջ։ Շենքի բոլոր հինգ հարկերն ունեն իրենց խոհանոցը։

Բացի այդ, կենտրոնի տարածքում գործում է մարզասրահ, ֆուդկորտ, հայ-վրացական խոհանոցի ռեստորան՝ դեմոկրատական գներով, բար, ավտոլվացման կետ, մանկական կենտրոն, որտեղ կարելի է թողնել երեխային։ Շուտով կբացվի նաև վարսահարդարման սրահ։ Ամեն օր առավոտյան և երեկոյան Երևանի կենտրոնից երթևեկում է մեր անվճար ավտոբուսը։ Մենք ստեղծել ենք այնպիսի մթնոլորտ, որ աշխատող մարդու օրը հագեցած լինի, և նա ոչ մի բանի կարիք չզգա։ Մեզ մոտ արդեն աշխատում է մոտ 300-400 մարդ։

«Նովոստի–Արմենիա»․ ի՞նչ զգացմունք է Woods Center-ի հիմքում, ի՞նչ կցանկանայիք, որ մարդիկ զգան, երբ առաջին անգամ գալիս են կենտրոն, և ի՞նչ եք զգում դուք։

Ա. Սաֆարյան․ առաջին հերթին ցանկանում էինք ստեղծել հարմարավետության և ջերմության մթնոլորտ։ Այդ պատճառով շենքի կառուցման նախագիծը վստահել ենք տաղանդավոր ճարտարապետի, որպեսզի այն տարբերվի մյուսներից և հարմարավետ լինի բոլորի համար։ Դրան նպաստում է նաև այն, որ շենքը կառուցված է որակյալ բնական շինանյութից։

«Նովոստի–Արմենիա»․ Woods Center-ն առանձնանում է նաև մեծ գրադարանով, ինչը հատկապես կարևոր է TikTok-ի և Instagram-ի դարաշրջանում...

Ա. Սաֆարյան․ ինչպես էլ որ փոխվեն ժամանակները, գիրքը միշտ մնում է առաջին տեղում։ Էլեկտրոնային գրքերը հարմար են, բայց գրքի թղթային տարբերակը, որպես գիտելիքի աղբյուր, մնում է անփոխարինելի։ Մենք ձեռք ենք բերել գրքեր, որոնց մեծ մասը անգլերեն լեզվով մասնագիտական գրականություն է։ Ուզում ենք ստեղծել մեծ գրադարան, որից կկարողանան օգտվել հնարավորինս շատ մարդիկ։

«Նովոստի–Արմենիա»․ երբ ցույց էիք տալիս Woods Center-ը, անընդհատ ուշադրություն էիք դարձնում տարբեր մանրուքների, հանձնարարություններ տալիս։

Ա. Սաֆարյան․ առաջին օրվանից ամբողջ հոգիս ներդնում եմ կենտրոնում։ Նախքան իմ գրասենյակ բարձրանալը, ամեն օր շրջում եմ ամբողջ տարածքով՝ առաջին հարկից մինչև հինգերորդ, մարզասրահից մինչև հիասքանչ տեսարանով բաց վերանդա։

«Նովոստի–Արմենիա»․ Woods նշանակում է «անտառ»։ Ինչպե՞ս եք զգում բնության և ճարտարապետության հավասարակշռությունը։ Այնպիսի տպավորություն է, որ բնությունը ձեր նախագծի կարևոր բաղադրիչն է։ Վիտրաժային պատուհաններից բացվող տեսարանն ամեն ինչ արժե, այն իսկական հակասթրես է։

Ա. Սաֆարյան․ մենք հատուկ այնպես ենք արել, որ կոնֆերանս-սրահներից և գրեթե բոլոր աշխատասենյակներից բացվի տեսարան դեպի անտառ։ Դա արվել է, որպեսզի մարդը մեր թվային դարաշրջանում չկորցնի կապը բնության հետ։ Չէ՞ որ հիանալի է, որ Երևանի կենտրոնից ընդամենը 15 րոպե հեռավորության վրա կարելի է վայելել ազգային պարկի տեսարանները։

«Նովոստի–Արմենիա» ․ ո՞րն է ամենահաճելի կոմպլիմենտը, որ լսել եք Woods Center-ի մասին։

Ա. Սաֆարյան․ որ Woods Center-ն առաջին անգամ այցելողների համար դարձել է անսպասելի անակնկալ և որ մարդիկ այստեղ զգում են հոգատարություն և հանգստանում են հոգով։

«Նովոստի–Արմենիա» ․ եթե նախագիծը նորից սկսեիք, ի՞նչ կփոխեիք և ինչո՞ւ։

Ա. Սաֆարյան․ ոչինչ չէի փոխի։

«Նովոստի–Արմենիա»․ դիտարկու՞մ եք համատեղ նախագծերի հնարավորություններ, մասնավորապես՝ Goght Urban Valley-ի հետ։

Ա. Սաֆարյան․ այո, իհարկե։

«Նովոստի–Արմենիա»․ Goght Urban Valley-ի հայեցակարգում ի՞նչն է ձեզ մոտ հարգանք առաջացնում, առանց որի գործընկերությունն անհնար կլիներ։

Ա. Սաֆարյան․ Goght Urban Valley-ի նման նախագծերը կարելի է միայն ողջունել։ Թաղամասը, ինչպես Woods Center-ը, մոտ է Երևանին՝ ընդամենը 30 րոպեի ճանապարհ է։ Այնտեղ ընթանում է լուրջ շինարարություն, որը պահանջում է մեծ ներդրումներ՝ այս ամենը նպաստում է մարզերի զարգացմանը և նոր աշխատատեղերի ստեղծմանը գյուղական համայնքների բնակիչների համար։ Համոզված եմ, որ շատերն ըստ արժանվույն կգնահատեն նախագիծը և կցանկանան ապրել Գողթում՝ հարմարավետ պայմաններում, բնության գրկում օգտվելով քաղաքակրթության բոլոր բարիքներից։ Հատկապես նրանք, ովքեր ընտրում են մաքուր օդ, անվտանգություն և երեխաներին որակյալ կրթություն տալու հնարավորություն։ Քանի որ Երևանը մեծանում և զարգանում է, այն պետք է բեռնաթափել։

«Նովոստի–Արմենիա»․ Woods Center-ը կզարգանա և կսոցիալիզացվի։ Ինչպե՞ս եք տեսնում այն 5-10 տարի հետո։

Ա. Սաֆարյան․ եթե նախագիծը շարունակի զարգանալ այնպես, ինչպես պլանավորում ենք, ապա կմասշտաբավորվի ամբողջ Հայաստանում։ Մենք կբացենք նմանատիպ կենտրոններ Տավուշի և Լոռու մարզերի անտառներում, որպեսզի մարդիկ հնարավորություն ունենան աշխատել տարբեր վայրերում։

Աղբյուր՝ https://newsarmenia.am/am/news/interview/haykakan-apagayi-grasenyak-woods-center-n-arajarkum-e-ashkhatanqayin-taratcqi-nor-dzevachap-bnutyan-grkum/